Jæja, þetta er annar bjóranna sem að ég lagði í síðustu helgi. Fólk hafði áhuga fyrir þessu á Bjórgerðar-síðunni á Facebook svo að ég ákvað að skella þessu hérna inn.
Forsagan er sú að ég hef aldrei lagt í Double IPA áður, sérstaklega vegna þess að ég hef aldrei tímt að sjá af svona mikið af humlum einsog þarf. Þett er einn af mínum uppáhaldsstílum og fæ aldrei nóg af DIPA-um þegar að ég er staddur í BNA. Ég var kominn með dágóðan lager af humlum þannig að það lá beinast við að leggja í einn. Ég bruggaði þennan einnig í tilefni þess að ég mun vera lærlingur hins eina og sanna Vinnie Cilurzo í Russian River Brewing Company í Santa Rosa í sumar. Honum hefur verið eignað þann heiður að hafa "fundið upp" DIPA stílinn fyrir ca15 árum síðan. Maður ætti að geta lært sitthvað um hvernig á að nota humla almennilega af þeim manni!
Jæja, uppskriftin:
41% Briess 2-row
43% Briess Vienna
5% Briess wheat
4% Briess caramel 20L
7% Demerara (hrásykur)
Einsog ég talaði um á bjórgerðarspjallinu, þá vildi ég ljósan og mjög gerjanlegan virti. Ég ákvað því að minnka O.G. úr 19P í 17P og bæta smá hrásykri við til þess að ná sem lægstum F.G. auk þess sem að ég meskjaði mjög lágt, 63C. Ég gerði ráð fyrir um 65% nýtni þar sem að ég meskjaði svona lágt og endaði í 60% eftir 90 mínútna meskingu. Ég bætti svo nægjanlegu hrásykri útí í lok suðunnar til þess að ná uppí 17P (1.070). Ég sauð virtinn í 90 mín.
Humlana byggði ég á humlauppskrift Hr. Cilurzos að Pliny the Elder sem að hann svo náðsamlega birti opinberlaga útfært fyrir heimabruggara. Þar sem að ég átti ekki allar gerðir humlanna gerði ég nokkrar breytingar.
30g Chinook 13% - 90min
30g Centennial 10%- 90min
30g Magnum 13%- 90min
30g Simcoe 13,2%- 45min
60g Amarillo 9,8%- 20min
40g Centennial 10%- 10min
60g Centennial 10%- 0min
30g Simcoe 13,2%- 0min
Fræðilega eru þetta 230 IBU!
Eftir suðu bragðaðist virtirinn svo vel að ég drakk allt flotvogssýnið
Kældi virtinn niður í 15C, þrýsti inn andrúmslofti og bætti S-05 geri við og leyfði hitastiginu smám saman að hækka og hélt því við 19C þegar að þangað var komið. Vatnslásinn hætti að búbbla eftir 96 klukkustundir og ég leyfði svo bjórnum að standa við 20C.
Tók sýni í gær. Fór úr 1.070 í 1.006! Hæstánægður með það. Alkóhólmagn 8,4%. Liturinn ljós og gruggugur (einsog ananassafi). Æðislega flókin sítrus, ananas og furu lykt og bragðið álíka magnað og ofurbeiskt.
Ætla að henda þurrhumlum útí á næstunni:
60g Amarillo
60g Centennial
60g Simcoe
Leyfa þurrhumlunum að liggja í bjórnum í 7-10 daga. (Endurnýti þurrhumlana sem beiskju humla). Crash cool. Færi svo yfir í kút, bæti etv meira centennial í kútinn, force carb, og skelli svo á kranann. Þá verður sko glatt á hjalla.