Allir eru velkominir á keppniskvöldið, jafnt keppendur, félagsmenn Fágunar sem og gestir. Aðgangseyrir er 2.500 kr en frítt er fyrir félagsmenn sem greitt hafa árgjald 2015. Þátttökugjald er 2.500 fyrir hvern bjór í keppnina, en ein innsending ókeyps fyrir félagsmenn. Það er því full ástæða til að ganga í félagið hafir þú hug á að senda inn bjór og koma á keppniskvöld, því félagsgjaldið er einungis 5.000. Sjá hér hvernig þú skráir þig í félagið.
Í þetta sinn var ákveðið að bjóða ekki upp á mat á staðnum. Í staðinn mun Fágun bjóða upp á léttar veitingar án endurgjalds. Auk þess verður allur bjór ókeypis. Fólki er velkomið að hittast á undan á einhverjum matsölustað ef það svo kýs. Rauða Ljónið á Eiðistorgi er næst salnum og þeir munu hugsanlega bjóða gestum einhver sérkjör. Það verður þá auglýst síðar hér.
Þar sem þetta er uppskeruhátið heimabruggara eru gestir hvattir til að koma með sinn eiginn heimabruggaða bjór og gefa öðrum að smakka. Ef einhverjir vilja koma með kúta þá er það velkomið. Vinsamlegast hafið þá samband við Fágun fyrirfram. Auk þess verða bjórar frá brugghúsum í boði eins og undanfarin ár.
Líkt og undanfarin ár verður útbúið sérstakt keppnisglas. Þar sem sérflokkurinn í ár eru hveitibjórar þótti við hæfi að hafa hveitibjórsglas þetta árið. Nánar til tekið er það 330ml og leisermerkt með merki Fágunar. Glasið býðst þeim sem panta og borga það fyrir laugardaginn 9. maí á kr. 2000, en það mun kosta 2500 á keppniskvöldinu. Vinsamlegast millifærið 2000 kr fyrir hvert glas á Fágun reikningur hér, tiltakið "Glas" sem skýringu og sendið afrit á fagun@fagun.is. Það er takmarkað magn í boði.
Nánar um keppnina
Skila þarf inn 6 flöskum 330ml eða stærri. Fylla þarf út skráningarblað og merkja allar flöskur með sérstökum keppnismiðum. Skráningarblaðið má nálgast hér að neðan. Boðið er upp á 2 útgáfur: Annars vegar er um að ræða Excel skjal sem fyllir sjálfkrafa út flöskumiða út frá upplýsingum á skáningarblaði. Hins vegar er það pdf útgáfa af sama skjali fyrir þau sem ekki geta notað Excel skjalið. Í sérstök hráefni/aðrar athugasemdir skal ekki setja inn heilar uppskriftir heldur benda á eitthvað sem hefur áhrif á bragð, t.d. ef þú ert að nota eitthvað sérstakt hráefni, krydd, ávexti eða annað, eða beittir einhverri sérstakri aðferð, brettaðir, sýrðir osfrv.
Vinsamlegast skilið svo flöskunum saman í einni handkippu (fæst ókeypis í ÁTVR ef þið eigið ekki) og vefjið skráningarblaðið utan um eina flöskuna. Hægt er að skila til eftirtalinna aðilla. Hringið á undan til að vera viss um að það sé einhver heima:
Sigurður, Oddagata 6, 101, sími 692 6141 - venjulega við flesta daga frá hádegi (ekki samt laugardaginn 2. maí)
Helgi, Mánagata 9 kjallari, 105, sími 844 8909 - á kvöldin frá og með sunnudeginum 3. maí
Björn, Torfufell 24 kjallari, 111, sími 847 3370 - á kvöldin (nema föstudag og þriðjudag)
Gummi, Dvergholti 21, 220, sími 821 7618 - flest kvöld eftir 18:00
Brew.is, Askalind 3, 220 - á opnunartíma 5.-7. maí
Athugið að síðasti skiladagur er fimmtudagur 7. maí kl. 20:00, þó er hægt að skila til Sigurðar í 101 fram eftir kvöldi
Hér að neðan eru reglur keppninnar birtar. Keppendur þurfa að kynna sér þær og staðfesta á skráningarblaði að þeir samþykki þær.
Gangi ykkur vel og góða skemmtun!
Bruggkeppni Fágunar 2015
Keppnisreglur
• Einungis “heimabruggaðir” bjórar sem bruggaðir eru af keppendum eru gjaldgengir í keppnina. Með “heimabruggaðir” er átt við að bjór sé ekki bruggaður í græjum sem tilheyra atvinnubrugghúsi
• Ef fleiri en einn aðili kemur að bruggun bjórsins skal tiltaka alla bruggara eða hópnafn. Ef bjór hlýtur viðurkenningu eða vinnur til verðlauna teljast allir bruggarar/hópurinn sem sigurvegari ef við á
• Skila skal inn 6 (sex) 330ml flöskum eða stærri af hverjum bjór. Síðasti skiladagur er 7. maí
• Keppanda ber að skila inn skráningarblaði fyrir hvern bjór og líma sérstaka keppnismiða á hverja flösku. Flöskur mega ekki vera merkar á neinn þann hátt að hægt sé að tengja þær við keppendur
• Þátttökugjald er kr. 2.500 á hvern innsendan bjór. Bjór er ekki gjaldgengur í keppnina nema gjald sé greitt að fullu.
• Sérhver félagsmaður í Fágun sem greitt hefur félagsgjald fær undanþágu á þátttökugjaldi fyrir einn bjór sem sendur er í keppnina, að því uppfylltu að félagsmaðurinn sé sjálfur bruggari eða meðbruggari bjórsins
• Keppandi skal tiltaka hvaða stíl bjórinn tilheyrir. Fara skal sem næst eftir þeim stílum sem listaðir eru á vef BJCP. Bjórar verða meðal annars dæmdir eftir því hversu vel þeir falla að stílnum sem keppandi tilgreinir. Ef vafi leikur á að bjór falli undir nokkurn stíl skal tilgreina stíl sem “23 Specialty Beer“
• Innsendum bjórum er skipt í 3 flokka er tilgreindir eru hér að neðan. Keppanda ber að tilgreina í hvaða flokk bjórinn fellur. Dómnenfnd getur þó fært bjór til milli flokka ef ástæða er til
- o Sérflokkur, sem saman stendur af þýskum hveitibjórum (stílar 15A, 15B eða 15C), belgískum wit bjórum (stíll 16A) og amerískum hveitibjórum (stíll 6D)
o Stór flokkur, þeir bjórar sem eru OG 1.060 (14,75 plato) og hærra
o Lítill flokkur, þeir bjórar sem eru undir OG 1.060 (14,75 plato)
• Besti bjór keppninnar verður valinn einn af þeim 3 bjórum sem hafna í 1. sæti í hverjum flokki
• Aukaverðlaun verða veitt fyrir frumlegasta/áhugaverðasta bjórinn að mati dómnefndar
• Auakverðlaun verða veitt fyrir hugmyndaríkasta/skemmtilegasta/mest viðeigandi nafn á bjór að mati dómnefndar. Ekki er skylda að nefna bjór sem sendur er í keppnina
• Að lokinni keppni verða birt dómarablöð með dómum um alla bjóra sem tóku þátt í keppninni.
• Uppskriftir bjóra sem sendir eru í keppnina verða eign keppanda. Mælst er til að sigurvegarar birti uppskriftir á fagun.is
• Ef vafi leikur á að innsendur bjór uppfylli skilyrði þessi hefur dómnefnd loka-ákvörðun varðandi hæfni bjórsins til að taka þátt í keppninni. Ef bjór er vísað úr keppni fæst þátttökugjald ekki endurgreitt.