Ég get því miður ekki svarað spurningunni, en get þó deilt eigin reynslu, hvers virði sem hún kann að vera.
Hef aldrei notað sigti eða reynt að sía eftir suðu. Á meðan ég hef kælt virtinn í pottinum hef ég reynt að búa til hringrás með því að hræra stöðugt, en með því sópast sorpið upp í keilulaga haug í miðjum pottinum. Svo hef ég notað hefðbundna fleytislöngu til að færa virtinn yfir í gerjunarfötuna.
Að gerjun lokinni hef ég haft örlítið frábrugðinn hátt á, en þó ekki svo. Klukkutíma fyrir átöppun færi ég gerjunarfötuna upp á eldhúsborð, og hleð einhverju undir hana þannig að hún halli nokkuð í átt að mér. Útbý sykurlausnina og skelli í hreina fötu, tylli prikinu á fleytislöngunni í botninn á gerjunartunnunni fjær mér (því nú hefur mesta gruggið runnið í áttina að mér), fleyti yfir í rólegheitum, o. s. frv.
Hef aldrei þurft að kvarta yfir lélegri nýtingu með þessu móti. Skil e. t. v. 200 - 300 millilítra eftir af vökva (gruggið undanskilið) í tunnunni.