Ég er búinn að vera forfallinn gerjunaráhugamaður í rúmt ár. Ég byrjaði á því að gera fínasta bjór úr suðulausu setti keyptu hér heima, sem þó var ekki með viðbættum sykri. Svo gerði ég nokkur extract sett, frá BNA, en er nú kominn á kaf í All Grain bjórgerð. Ég hef líka gert léttvín (aðallega fyrir brúðkaupið mitt) með gæðasettum úr Ámunni, en hef alla jafna ekki gaman að því að gera bjór úr tilbúnum settum.
Ég hef mikla ástríðu fyrir því að hanna góðan bjór. Vissulega líka fyrir því að njóta hans, en drekk þó ekki ýkja mikið. Fyrir mér snýst þetta áhugamál um leitina að hinum fullkomna bjór - fyrir mig hverju sinni. Bjórgerð hefur opnað fyrir mér nýjan heim og nýja innsýn í það hvað bjór er í raun og veru - ekki gult sull sem maður þambar af krana til að detta í það, heldur heill heimur af ólíku bragði og möguleikum sem maður mun aldrei kynnast nema að litlu leyti, svo fjölbreyttur er hann.