Nýr gaur

[Diazepam]

Sælir Áhugamenn,

Hingað til hef ég fyrst og fremst verið áhugamaður um bjórdrykkju og hef sem slíkur aldrei komið nálægt bruggun fyrr. Ég hef þó heimsótt Carlsberg brugghúsið í Kaupmannahöfn, en ég var aðallega að smakka framleiðsluna, og bý því ekki af neinni reynslu eftir þá heimsókn.

Nú hins vegar langar mig að framleiða mitt eigið og því fór ég að leita mér fróðleiks og lenti inná þessari síðu ykkar. Ég er mikið að hugsa um að sleppa allri upphitum og byrja bara á djúpu lauginni. Framleiða AG eins og þið kallið það. Hef ég nú lesið þetta spjall ykkar í nokkrar vikur og drukkið í mig þann fróðleik sem þar er að finna, einnig hef ég verið að rýna í bók Johns Palmers. Þetta liggur nú ansi vel fyrir mér og því held ég að það sé ekki neitt til fyrirstöðu að byrja bara, en hver veit nema að mér takist að klúðra því.

Það er nú dálítill stofnkostnaður í kringum þetta en ég var að hugsa um að byrja frumstætt og bæta svo við mig græjum eftir því sem krafan um aukin gæði verður meiri. Það gengur vel að verða sér úti um fróðleik um þetta efni, en mér finnst það mætti vera auðveldara að verða sér úti um hráefni.

Ég er mjög þakklátur ykkur fyrir þessa síðu og vonast til þess að geta leitað til ykkar þegar þörf krefur.

kveðja
Diazepam

[Eyvindur]

Velkominn. Gaman að heyra að þú ætlir beint í almennilegheitin. Ég mæli með því við alla. Þetta er enn minna mál en það hljómar á prenti.

Ekki vera vanþakklátur með hráefnið. Áður en ÖB fór að selja þetta var eini möguleikinn að panta að utan, með tilheyrandi kostnaði. Ég var að borga næstum þrefalt verðið hjá ÖB fyrir malt á þeim tíma, og það var fyrir kreppu. Ég kvarta sko ekki.

[Diazepam]

Alls ekki skilja þetta sem svo að ég sé vanþakklátur, ef það væri ekki hægt að fá malt í ÖB væri ég sennilega ekki einu sinni að hugsa um að undirbúa framleiðslu. En þetta mætti samt vera ennþá auðveldara, lengi getur gott batnað ekki satt.

[sigurdur]

Velkominn.