Rétt hjá Gunnari að það er sniðugt að lesa How to Brew eftir Palmer.
Anton hittir einnig naglann á höfuðið...
en þar sem ég er einmitt í stuði til að svara svona spurningum þá ætla ég að gera það (afsakið ef ég er að endurtaka fyrri svör)
1. Þarf ég að sótthreinsa sykurvogina í hvert skipti sem ég mæli sykurmagnið í bjórnum?
Ef þú hefur það ekki í þér að hella þessum 100 ml í vaskinn þá myndi ég sótthreinsa flotvogina og mæliglasið. Ég mæli samt alls ekki með því að hella mælisýninu aftur í fötuna. Ef hins vegar þú ert að mæla áður en þú sýður virtinn þá er í góðu lagi að sleppa sótthreinsun og hella úr mæliglasinu aftur í pottinn.
2. Þegar ég fleyti bjórnum yfir á dúnk nr 2, þarf ég þá að sótthreinsa hann áður?
Já. Ég mæli með að þú kaupir þér Joðfór, t.d. á http://www.brew.is" onclick="window.open(this.href);return false;" onclick="window.open(this.href);return false;" onclick="window.open(this.href);return false; og notir það til að sótthreinsa "dúnkinn" áður en þú setur bjórinn í hann. Það er virkilega svekkjandi að hafa vandað sig við að gera góðan bjór og klúðra honum svo þegar þetta er næstum komið í höfn.
3. Þarf ég að sótthreinsa flöskurnar sem ég tappa á?
Já... sjá svar nr. 2
4. Er bjórinn ónýtur ef vatnslásinn er hættur að búbbla, eða er búinn að vera hættur í nokkurn tíma?
Nei. Það þýðir að gerið er búið að gerja það sem það ætlar sér að gerja.
5. Á ég að strá gerinu yfir lögunina og loka eða hræra því vel saman við lögunina?
Það eru skiptar skoðanir um þetta (allavega hér á Fágun). Ég strái yfirleitt yfir virtinn og loka. Þú færð fínan bjór í 95% tilfella og ættir að byrja á því að gera þetta svona, en lesa þér svo betur til um þetta og velja þá leið sem hentar þér tímalega og áhugalega (er það orð?)
6. Þegar ég er búinn að fleyta bjórnum yfir á dúnk númer 2, þarf ég að láta hann setjast í einhvern tíma áður en ég fleyti honum á flöskur?
Ef þú hefur aðgang að "köldu" rými (1-15°C) þá myndi ég hiklaust nota það í secondary (dúnk númer 2) í eina til tvær vikur til að leyfa gerinu að setjast betur (og hraðar) en auðvitað eru líka skiptar skoðanir hér með secondary og margir hér telja það aðeins auka hættuna á sýkingu og ekki gera neitt sem geymsla í flöskum myndi ekki gera á endanum. ATH þegar þú fellir gerið í gerjunarílátinu getur það þýtt að bjórinn er lengur að ná upp kolsýru á flöskum, en yfirleitt á þetta aðeins við um það þegar þú ert með bjórinn við mjög lágt hitastig í langan tíma. Kolsýran kemur á endanum enda eru alltaf einhverjir duglegir gerlar sem eru tilbúnir að vinna á meðan hinir hvíla sig.
7. Ég er að brugga 25 lítra af bjór. Hveru mikið magn af sykri á ég að leysa upp til að bæta út í dúnk nr 2?
Ég mæli eindregið með því sem Anton talar um; að kaupa þér Beer Smith forritið, sem hjálpar þér við að reikna út hæfilegt magn sykurs sem hentar þeim stíl, magni, og gerjunarhita bjórsins sem um ræðir. Auðvitað er hægt að nota hinar ýmsu reiknivélar á netinu til að finna þetta út, en Beer Smith (eða sambærilegt forrit) á eftir að vera ein besta (20$) bruggtengda fjárfestingin sem þú leggur í þar sem það hjálpar þér við gerð og utanumhald uppskriftanna þinna.
8. Á ég að hræra viðbætta sykrinum vel saman við bjórinn áður en ég fleyti honum yfir á flöskur?
Ég myndi hiklaust leysa sykurinn upp í sjóðandi vatni (um 250 ml af vatni fyrir 20-25 lítra lögn) áður en ég blanda honum út í bjórinn. Þú hellir sykurlausninni í (sótthreinsaða) fötu og fleytir síðan bjórnum ofan á sykurlausnina. Það er gott ráð að hræra aðeins upp í bjórnum þegar búið er að fleyta honum yfir... en passaðu þig að hræra varlega þar sem þú vilt ekki fá súrefni í bjórinn fyrir átöppun.
9. Er 22°C hiti ásættanlegur fyrir bjórlögun í gerjun?
Þetta hitastig hentar mörgum bjórstílum og gertýpum mjög vel en öðrum afar illa. Best er að lesa sér til um það hvert kjörhitastig þess stíls og gers, sem þú ert að nota hverju sinni er og reyna að halda sig þægilega innan þeirra marka sem gefin eru. Ef þú ert með hlutlaust ger þá skiptir ekki miklu máli hvar þú ert á skalanum (innan gefinna marka) en þegar þú ert með ger sem spilar stóra rullu í bragðinu á bjórnum (eins og til dæmis hveitibjórsger) þá fer hitastigið að skipta miklu máli.
Þetta er lengsta svar sem ég hef skrifað hér á Fágun og ef þú lest það ekki í gegn þá verð ég brjálaður
