Fágun

Sælir,
ég hef einmitt verið að spöglera í hlutsuðu? (decoction) svona til prufu, helst til að fá meiri tærleika og malt karakter. Ég geri mér vel grein fyrir hversu mikinn tíma það tekur, en það verður enginn óbarinn biskup. Hér er annars mín uppskrift að Münchner Helles frá grunni Beer Tools, endilega rýnið í aðferðarfræðina þar sem ég er handviss um að það séu villur á nokkrum stöðum:

Almennt:

• Flokkun: Ljós lager
  Undirflokkun: Münhener Helles
  Aðferðarfræði: Kornbruggun með hlutsuðu
  Magn lögunar: 18,93 l
  Magn suðu: 22,71 l
  Nýtni: 71,9 %
  Kaloríur í 100 ml: 51,75
  Upphafsþyngd: 1.046
  Lokaþyngd: 1.009
  Litur: 7,94 EBC
  Beiskja: 18.6 EBU
  Áfengismagn (%volume): 4.9 %
  Magn og verð bygg: 4,31 kg á 1427 kr
  Magn og verð humlar: 47,0 g á 715 kr
  Magn og verð ger: 23 g á 2012 kr
  Verð á hráefni: 4184 kr
  Annar kostnaður við lögun: 1146 kr
  Heildarkostnaður: 5360 kr
  Kostnaður á 0,33 l flösku: 96 kr

Uppskrift:

• 1. 4,23 kg Weyerman Premium Pilsner Malt frá Ölvisholti (2,0 - 2,5 EBC)
  2. 0,08 kg Weyerman Munich TYPE I frá Ölvisholti (12 - 18 EBC)
  3. 19 g Hallertau Mittelfrüh (Pellets, 4.5 %AA) soðið í 60 mín
  4. 14 g Hallertau Mittelfrüh (Pellets, 4.5 %AA) soðið í 15 mín
  5. 14 g Hallertau Mittelfrüh (Pellets, 4.5 %AA) soðið í 1 mín
  6. 23 g Ger Fermentis Saflager W34/70 2x 11,5g

Meskjun með einfaldri hlutsuðu ( 6 klukkustunda vinna):

• 1. Setja 4,31kg malað maltað korn við 20°C ± 1°C í meskiker
  2. Blanda (Dough in) 12,5l af 41°C ± 1°C vatni yfir maltið
  3. Sýruhvíld (Acid rest) 38°C ± 2°C í 15 - 30 mín til að jafna sýrustig
  4. Rúmmál/þyngd korngrauts fyrir eggjahvítuhvíld á að vera 2,5 l/kg
  5. Eggjahvítuhvíld (Protein rest) 54°C ± 1°C
  6. Heildartími fyrir eggjahvítuhvíld er 20 mín
  7. Taka ca 1/2 af korngraut úr meskikeri og setja í pott (Decoction)
  8. Sýrustig á blöndu á að vera pH 5,3 - 5,6
  9. Hita þykka hlutsuðu (2,5l/kg) í potti hægt að 65°C ± 1°C
  10. Geyma hlutsuðu í ca 15 mín á meðan eggjahvítuhvíld stendur
  11. Sjóða svo hlutsuðu í 5 mín
  12. Bæta heitum korngraut og vatni eftir réttu máli að 66,5°C ± 1°C
  13. Hræra vel í korngraut til að jafna út hitastig
  14. Mæla stöðugt hitastig fyrir sykurhvíld
  15. Þéttleiki fyrir sykurhvíld á korngraut skal verða 3,7 l/kg
  16. Sykurhvíld (Saccharification rest) 66,5°C ± 1°C í 45 mín
  17. Heildartími fyrir sykurhvíld er 45 mín
  18. Athuga umbreytingu á sterkju í meskigraut með joði (ætti að verða litlaus)
  19. Reikna út nauðsynlegt magn af kornsuðu sem þarf til að stöðva meskun í 75°C ± 1°C
  20. Stöðva meskjun (Mash-out) 75°C ± 1°C í 30 mín

Virtsuða (3 klukkustunda vinna):

• 1. Hella meskjunarvökva yfir í suðupott og hita að suðu
  2. Ræsa niðurteljara er rúllandi suða byrjar (rolling boil)
  3. Sjóða virta í 90 mín
  4. Eftir 30 mín suðu bæta beiskju humlum varlega við
  5. Eftir 60 mín suðu setja kælispíral í suðupott
  6. Eftir 70 mín suðu bæta 1g protafloc við suðu
  7. Eftir 75 mín suðu bæta bragð humlum varlega í við
  8. Eftir 85 mín suðu tengja kælispíral
  9. Eftir 89 mín suðu bæta ilm humlum varlega í við suðu
  10. Að 90 mín suðu lokinni slökkva á hita
  11. Kæla virta í 20 mín eða þar til hann nær 11°C ± 1°C

Fyrri gerjun (3 klukkustunda vinna og etv. 2 vikna lagering):

• 1. Hreinsa og sótthreinsa áhöld, ílát og tæki
  2. Fylla virta á fyrri gerjunarkút
  3. Loka kút með loftlás (vodka sem frostvörn í loftlás)
  4. Láta kælast niður í 9°C ± 1°C
  5. Lofta um virta með loftdælu og steini í 30mín
  6. Bæta ger út í fyrri gerjunarkút
  7. Bíða þar til TG verður 1010-1012 tvo daga í röð
  8. Kæla hægt niður um 1°C á dag niður í 4°C ± 1°C

Seinni gerjun (3 klukkustunda vinna og etv. 4 - 6 vikna lagering)

• 1. Hreinsa og sótthreinsa áhöld, ílát og tæki
  2. Flytja úr fyrri gerjun í seinni gerjunarkút með auto-siphon
  3. Mæla FG reglulega eftir 2 vikur
  4. Leyfa að gerjast við 1°C ± 2°C í 4-6 vikur

Áfylling og átöppun ( 4 klukkustundir og geymsla í 2 - 4 vikur):

• 1. Stöðva gerjun með því að setja kæla seinni gerjun niður í 1°C
  2. Hreinsa og sótthreinsa áhöld til átöppunar, flöskur og tappa
  3. Leysa upp dextrose sykur með sjóðandi vatni
  4. Fleyta gerjuðum bjór yfir sykurblöndu í áfyllingartunnu
  5. Fylla á flöskur við -1°C ± 1°C
  6. Merkja tappa á flöskum
  7. Geyma flöskur við 4°C í 4 vikur

Heildartími þar til bjórinn verður tilbúinn uþb. 8 - 10 vikur.

þetta verður örugglega gaman.

mjög áríðandi að þú og kornið takið góða eggjahvítuhvíld

mér sýnist leiðbeiningarnar þínar vera fínar. sé ekkert að þeim.

Ertu með eitthvað til að bera þetta saman við? Ég myndi persónulega aldrei leggja í þetta nema að gera sama bjór með single infusion OG step infusion líka, til að geta borið saman. Sumir halda því fram að decoction mash sé ofmetin, og þar sem svona mikið ferli er eitthvað sem maður leggur ekki í reglulega fyndist mér fráleitt að gera þetta nema geta fundið muninn á öllum þessum misjöfnu meskiaðferðum.

Bara minn túkall. Annars mikill metnaður, sem þú átt hrós skilið fyrir.

Þetta verður bara gaman, en hvaða skoðun hafið þið á þessu frjálsræði í þýðingum, ég er nú langt í frá sáttur með eftirfarandi þýðingar og það væri kærkomið að fá annað álit:

Hlutsuða = Decoction
Upphafsþyngd = Original gravity
Lokaþyngd = Terminal gravity
Blöndun = Dough in
Hvíld = Rest
Sýruhvíld = Acidrest
Eggjahvítuhvíld = Protein rest
Sykurhvíld = Saccharification rest
Þéttleiki = Consistency
Stöðva meskjun = Mash-out
Rúllandi suða = Rolling boil

Eyvindur wrote:Ertu með eitthvað til að bera þetta saman við? Ég myndi persónulega aldrei leggja í þetta nema að gera sama bjór með single infusion OG step infusion líka, til að geta borið saman. Sumir halda því fram að decoction mash sé ofmetin, og þar sem svona mikið ferli er eitthvað sem maður leggur ekki í reglulega fyndist mér fráleitt að gera þetta nema geta fundið muninn á öllum þessum misjöfnu meskiaðferðum.

Bara minn túkall. Annars mikill metnaður, sem þú átt hrós skilið fyrir.

Já, það er á dagskrá að framkvæma einfalda og þrepablöndun, og ef afraksturinn verður drekkanlegur mætir maður að sjálfssögðu með nokkrar flöskur á mánudagsfund.

Flott mál. Um að gera að vera tilraunaglaður.

Hér eru nokkrar myndir frá þessari lögun. Hlutsuða og þrepamesking varð fyrir valinu, reyndar 2,5x stærri en upphaflega, og ég tapaði ca. 15l þegar það sauð upp úr hjá mér (því miður engar myndir af sóðaskapnum) . Einnig tókst mér að setja 10l of mikið af vatni út í gerjunarkútinn og næ því ekki réttri upphafsþyngd (OG) fyrir Munchener Helles stílinn
Gerjunin miðast þó vel áfram við 12°C í vatnskælingu og Fermentis W-34/70 gerið gefur þennan yndilsega brennisteinsilm frá sér sem mettar vel andrúmsloftið í kjallaranum. Hlakka til að fleyta um tunnu eftir viku.